Arraz wis sin n tfeska n Udrar n Fad yewwi-t Mass Amirouche Hamidouche, ɣret tamedyezt-is !
Agrud n wafrasen
1/ Tebra tmeṭṭut ur nejriḥ
D nekkini i t-id-yennan
Regmeɣ-k a win ur neqbiḥ
Ma ayen twalaḍ ur qerriḥ
Deg-k ur ttidiren yineẓman
Tahregt deg-i tettiṣṣiḥ
Tafekka-w tga am ujajiḥ
Mi d-neggra deg yir zzman.
2/ D ayen ur yellin di targit
A wi yesεan ul-is yekkat
Σeddaɣ-d lewhi n tṣebḥit
Mazal tegres ɣef tiẓẓit
Urεad d-tefrari tafat
Ḥulfaɣ tembawel ddunit
Seg tiṭ turag-d tiqit
Qqlent am wasif di snat.
3/ Tafrest teggar-d tiɣri
Fkiɣ tameẓẓuɣt ma d tidet
Deg yigenni yensa yitri
D awḥid yendef-as yiẓri
Serseɣ afus ɣef tayet
Muqlet amek i tga tayri
Yessusem ula d abeḥri
Yeffeɣ ubeḥri ɣef turet.
4/ D llufan n at war isem
Mazal idim di tfekka-s
Mi t-walaɣ ul-iw yeεdem
Ḍeggṛen-t ur yessaweḍ irem
Ilul-d immuger-it wassas
Qerbeɣ ɣur-s yessusem
Ḥulfaɣ yenta deg-i yistem
Anda-ken ah! ay at tissas.
5/ Yezmumeg fkiɣ-as afus
Aḍad-iw yerra-t deg yimi
Yettsummu deg-s yesnuffus
Yettwehhi-yi-d s uyeffus
Ixuṣ ad d-yini: Acimi
Terra-m amdan d ayemmus
Ded yiḍumman yettexnunus?
Ad awen-wekkleɣ Ṛebbi.
6/ Wissen amek i asen-ittunefk
Ǧǧan-t i usemmiḍ yettru
Amek a zzman ccmayet ifen-k
D ayen ideg ur yelli ccekk
Fkan arrazen i uɣurru
Netta iḥekku-d jerḥeɣ nekk
Yenteḍ ufus-iw ɣef lḥenk
Ḥulfaɣ i uglim yecrew.
7/ Tḍeggreḍ-iyi s yidammen
Tafejrit mazal ṣṣbeḥ
Ini-as i yemma εzizen
Ur yelli ḥedd i t-yifen
Ḍleb Ṛebbi ma ad am-yesmeḥ
Asemmiḍ i yi-ijeggfen
Ur d iyi-terriḍ lekfen
Wissen tasa-m ma tejreḥ.
8/ Ini-as d acu-t wul tesɛiḍ
Yeḥbes neɣ mazal yekkat?
Acḥal d taryalt i d-tejniḍ?
Mi akka s nnif-im tenziḍ
Terniḍ tetthuzzuḍ tuyat
I yiseɣ-im anda i t-terriḍ?
Teṭṭfeḍ abrid-im telḥiḍ
Ihi ɣas heggi tamrart.
9/ Ini-as i wihen yettawin
Allaɣ-is lewhi n timiḍt
Aql-ak seg wid ur yeswin
Tefkiḍ-iyi i twekkiwin
Ur iyi-terriḍ di tceṭiḍt
Tirga-inek akk d timedlin
D anza-w ara k-yessakin
Ad k-yeskuṭṭuf di tqeṭṭiṭ.
10/ Ini-as kečč mačči d amdan
D ageldun deg yiɣersiwen
Mmel-aɣ-d isem-ik wi k-ilan
Ma tefruriḍ-d seg yimawlan
Aẓar-ik mačči yiwen
Kečč d mmi-s n yiberdan
Am yemma tin k-id-yesεan
Ɣas ssemɣi-d acciwen.
11/ Ini-asen i wid icennun
Ad d-rnun deg tid n ccḍeḥ
Ini-asen i wid yettargun
I yesmuɣbunen ur ṛeggun
Rnut i tfekka rrwayeḥ
Ḥerqent tergin di lkanun
Ur teḥṣim d acu i iḍerrun
Tid n yiḍ neɣ tid n ṣṣbeḥ.
12/ A wid yettargun argut
Ma d nekk gar wallen-iw tafat
Ay at Qessam ssefrut
Yeḥgen deg-i dayen ṣṣut
Ttxil-wen afet-d tifrat
Ma yella wul di tmeṭṭut
Neɣ deg win yeslalen taṛbut
Slet-as ugar ma yekkat.
Dda Moh-Weɛli
Di tejmaɛt fran-tt di ṛṛay
Ttnejmaɛen yal aseggas
Mi yekfan dayen ameslay
I Dda Moh-Weɛli nnan-as
Ccan-ik ɣer Ṛebbi ɛlay
Dɛu ad fsint tyerras
Ad yixfif kra ma ẓẓay
Akken ur nqeṭṭeɛ layas.
Moh- Weɛli yerfed ifassen-is
Yebda la ideɛɛu seg wul
A Ṛebbi ass-agi n lexmis
Nessuter-ik ur d aɣ-ttɣull
Aɣrib ad d-yeqqel axxam-is
Fell-as lɣerba ur tettḍull
Tasa ad temlil d mmi-s
Amine !! ṣellit ɣef ṛṛul.
Sseḥlu wi illan d amuḍin
A Ṛebbi d kečč i nɛenna
Ur neffiɣ abrid n ddin
Numen s leqran d ssunna
Tezgiḍ sennig-neɣ d aḥnin
A nnaɣ a bab n lqedṛa
Init-d akk yid-i amin
Ay At nnif d lḥeṛma.
I wid ur yeskiren axxam
Lhu-d a Ṛebbi yid-sen
Ɛelleq-asen yakk tixutam
D kečč kan ara ten-iɛassen
Welleh-asen abrid n lewqam
Ad izdigen ur ttamsen
Moh-Weɛli ixtem-itt s sslam
Yettraju ad t-id-xellṣen.
A Dda Moh tettuḍ wiyiḍ
Amer ad sen-d-tedɛuḍ kra
Ɣas akka neẓra-k teɛyiḍ
Yecqa-k yak mačči xṣara
D kečč i d ccix teḥsiḍ
Ad tsebreḍ terra tmara
D ttwab kan ara tawiḍ
Ɣer Ṛebbi ulac tuffra.
Tettuḍ wid ur yettɣerrben
Ufan-as ddwa i tmurt
Ɣur-sen ṣṣeḥa d yedrimen
Ma ur ččin aksum d lḥut
Tettuḍ wid ur yehliken
Ttafen-as lbenna i lqut
D wid iskren ixxamen
Kullec ɣer ɣur-sen d tafsut.
Ttemyexzaṛen seddaw tiṭ
Moh-Weɛli i nnda yettfaq
Iɛedda-d si myal tabriṭ
Yettḥulfu i rrɛud d lebraq
Yerra ɣer lǧib-is taxṛiṭ
Yeẓra amek i d asen-ilaq
Yessuli ṣṣut-is cwiṭ
Ṭṭef-n ɣur-k ay axellaq.
Ad d-yawi Rebbi aṭṭan
I wid ur nehlik werǧin
Ad asen-yerr ddunit d qeḍran
D winna ara ten-yawin
Ssehlek yakk wid ihennan
Am yirgazen am tulawin
Ḥemmlen win i ten-ixeṭṭan
Init-d akk yid-i Amin !!
I wid akk ur netɣerreb
Ssifeg-iten a Ṛebbi ttxil-k
Aḥlil win ur njeṛṛeb
Yerra leɛjaṛ d uḥayek
Gar lɛaṣer akked lmeɣreb
Nessuter-it ma ad d-iḥerrek
Tamurt-a turew-d leɛǧeb
D kečč kan i d imsellek.
Ad d-yawi Ṛebbi inebran
I wid igan ixxamen
Hat msakit d imeɣban
Ččan-ten yixemmimen
Aseɛdi d win ihennan
Zwit icuḍaḍ-nwen!
Ssuref-iyi a bab n lbeṛhan
Mi d-ɣliɣ gar yemcumen.
Wi ibɣan ad yurar tiddas
Yella dadda-twen Weɛli
Ddunit-iw akk di txidas
Ttakiɣ i nnda mi d-tɣelli
A nekk yettṛajun lexlaṣ
Ziɣ tettkeɛɛiẓem fell-i
Ad awen-ifek Ṛebbi qawsas
Wa ad awen-teɛṛeq tikli.
Deg umulli-w
Deg umulli-w refdeɣ leɛyaḍ
Teqqeṛs tyersi i icudden
Tgiḍ gar leɛyun d ticṛaḍ
Yis-sent i zellmeɣ allen
Ur yelli wul d asemmaḍ
Neɣ kkawen-iyi yifadden
Ɣas yettban-d amzun d ablaḍ
D tiṭ i srewleɣ ɣef medden.
Mi kkreɣ di tayeḍ ad ɣliɣ
Weṛǧin ɛeddaɣ tilisa
Sdat-i ḥedd ur d-ufiɣ
Seg wass-n yecban ass-a
Ulayɣer ad d-mmektiɣ
Tacemmaɛt tṛuḥ tensa
Ayen meṛṛa iumi icfiɣ
Imeṭṭi yugar taḍsa.
Si tmanyin tezgiḍ d tafsut
Ur tettɣar ur tkennu
Tunṭiqt-im taneggarut
D taɛeṛset deg yisem-inu
Wecmeɣ-tt s lliqa n tegrurt
I wakken ad d-tettban inu
Dehneɣ-tt s tamment taḥṛurt
Deg uglim ur tfennu.
Deg wallaɣ ggrant ccwami
Weṛǧin ur tent-fhimeɣ
Kessent amṛij n tsusmi
Ar ass-a ulint-t tezweɣ
Ma ittader-itent-id yimi
Ur yelli d ayen ara ffreɣ
Renunt-iyi-d di tmussni
Deg tira i tent-id-beddreɣ.
Trennuḍ di leɛmeṛ i useggas
Ur ttiwriɣen yimɣan
Akud-iw yeqḍeɛ layas
Deg yimi-w ḥeggnen yisuɣan
Yeskuṭṭuf deg-i wassas
Ul-iw yezga d win yezzan
Iles-iw yettel gar tuɣmas
Akkwass am yinyen yerɣan.
Weḥd-i a medden i ttarguɣ
Yiwen ur d iyi-iṭṭif afus
Cfiɣ acemma ur t-ttuɣ
Yewcem deg ufus ayeffus
Senndeɣ ɣef tesga ttaruɣ
Ɣas ma meṛṛiɣ neɣ messus
Ayen akken ǧǧiɣ ma ad d-isuɣ
Amer taɛkemt ad tifsus.
Ay amulli-w ur neffeḍ
Ur ttlummu ɣef tefsut
Ɣas ma s tsusmi ɛeggeḍ
Kkes-as i unezgum tacrurt
Deg wayen i iɛeddan sfeḍ
Iɛedda unezgum ttut
Faṛes ul-ik skud semmeḍ
Gzem ixulaf i tegrurt.
