Awal n tallit: ula d aḥzan, issinet s teqbaylit! (Sɣur Aẓar)
Ma tewḥel fell-asen maḍi maḍi, tuget n yigduden d yiɣerfan deg umaḍal ddakkalen ɣef wayen yerzan tignatin n teqriḥt d tumert, d wansayen akk i ten-yeṭṭafaren.
Maca nekni, seg wacḥal d timrawin n yiseggasen aya, ur aɣ-ǧǧin wiyeḍ ad nsuddes iman-nneɣ akken ad as-neddu i taluft-a akken nebɣa. Iḥettem-d wayeḍ i tmetti-nneɣ ayen yebɣa netta, iteddu wakud, tettimɣur yid-s tannumi.
Ass-a dɣa, seg wakken yemɣi ddin asertan i yezreɛ udabu, yuɣal Uqbayli yettwali ala s teɛrabt i yezmer ad irebbi assaɣ akked Rebbi. Armi simmal yettuɣal d Aɛrab, s tikli d yidles, netta ur yeẓri. Ula m’ara d-teḍru tmettant, iɣil ilaq kan ad d-iberreḥ ulɣu n tmettant s teɛrabt, ad isirem kra i umattan s teɛrabt, ad iḥzen s teɛrabt. Llan ula d wid yettwaseḥḥren maḍi, ssawaḍen ayen yettwaẓẓan yakan deg-sen, la qqaren: « ala s teɛrabt i ilaq ad tsirmeḍ kra i win yemmuten ». Ɣas ulama caḍent tenfaliyin, yecban: « ad isgunfu di talwit », « talwit i yiman-is », « ad as-yili wakal d afessas ». Neɣ tid n yineslem: « fell-as yeɛfu Rebbi », « ad t-yeg Rebbi deg umḍiq n rreḥma ».
Nwala ula d isdawanen ddan di tqeffet n useɛreb n yiman d yiḥulfan. Yir rray rnu-as iẓeṭwan inmettiyen. Ḥaca ssnen tura ad ḥeznen s teɛrabt, ad zuzzren aḥzan s teɛrabt. Meḥsub tettbin ɛinani d tineslemt tasertant i la sseqdacen, i win yebɣan ad d-yaki, imi ssawalen i uɣunzu n yiles-nneɣ d urfad n yiles aɛrab.
Aredmani, win yebɣan ad yili d netta akked Rebbi-s ilaq kan ad iseqdec tutlayt-is; tin n tlalit. I tudert, i tmettant. Yenna Ccix Muḥend Ulḥusin: « taqbaylit d rray, ddin d nniya ».
Ma d ineslem i yella, ad d-yini ayen s ittamen s teqbaylit. Ma d amasiḥ kifkif, ma d ayen nniḍen daɣen. Akken tebɣu tili tesreṭ n Uqbayli, neɣ tamuɣli-s ɣer tudert, yuwwi-d kan ad iḥzen s teqbaylit di tegnatin n ṭṭiq, ad yumer s teqbaylit di teswiɛin n tumert.
Ula d tutlayt, tettidir tettmettat. Ihi meqqar, sqedcem-tt m’ara tḥeznem. Zuzzrem s tutlayt-nwen deg uẓeṭṭa m’ara tḥeznem. Ur tt-neqqet s lebɣi-nwen akken ad tsidrem taɛrabt-NSEN. Xersum deg usenfali, ad yeḥzen yiwen s teqbaylit. Deg tigawin, ad d-nawi awal deg wuṭṭun nniḍen.
Walit imedyaten n tewlafin s teqbaylit i tzemrem ad tzuzzrem di tegnatin n teqriḥt.
Découvrez:
