(Tavidyut)Covid-19 di Tmurt: Zedek Mouloud iger-d tiɣri i ukemmel n twizi

Am tal tikkelt, tamḥaddit n Zeddak Mulud teqqen ɣer wayen akk iḥuzan Iqbayliyen. Daymi i d-iger iman-is unaẓur-a Aqbayli ameqqran, s ubrid n usebter-is unsib n Facebook, akken ad iluεa wid i t-yeṭṭafaren, ad ten-yesḥulfu di tegnatin-a iweεren i tettidir Tmurt Taqbaylit.

Dɣa, tavidyut tamezwarut isuffeɣ-itt-id ass n 30 yulyu, ideg i d-yessawel i Yiqbayliyen, tugart wid n lɣerba, ad kkin s ṭṭaqqa deg tbezzarin i d-yettwaheyyan di internet i tiɣin n tmacinin n uksijin i sbiṭarat. Gar wayen i d-yenna: « Ass-agi tagnit d yir nettat. Taswiεt ur telhi ara maḍi maḍi. Acu kan, akken qqaren, ulac aṭṭan ur nesεi ddwa (…). Tiwizi ǧǧan-aɣ-tt-id lejdud-nneɣ ad tt-newret. Nufa-tt-id ad as-nkemmel (…). Ad iniɣ i wigad izemren, ad d-gren afus ».

Zeddak Mulud yesḥassef daɣen imi iɣab uwanek azzayri di lmeḥna-a, imi d-yenna « ɣas ad d-nini ulac-it ». Ur yettu ɣer taggara ad d-yesmekti medden ɣef yisillfen ilaqen akken ad yerr yiwen avirus-a, am ukman, asizdeg d uṭixxer i yimyegrawen (yinejmuεen).

I telɣut, yuɣal-d Zeddak Mulud daɣen ass-a s yiwet n tvidyut i d-iga beddemma i wat lεerc-is n At Dwala. Yessawel-asen ad fken tadrimt, ad zdin iɣallen, bac ad d-aɣen dduzan ilaqen i sbiṭar-nsen.