Covid-19: uwwḍent-d teɣsar n uksijin ɣer rebεa n sbiṭarat n Bgayet

Mbaεd kra n wussan n uraǧu, uwwḍent-d, iḍelli 7 ɣuct, teɣsar (stations) n uxdam n uksijin ɣer kuẓ n sbiṭarat n ugezdu n Bgayet: win n Xellil Ɛemran, Amizur, Xerraṭa d Sidi Ɛic. Asbedd-nsen deg umkan ad yili isragen-a n sdat-neɣ i wid mazal ur bedden εad.

D abeḥri i turin ara yekksen leεtab ɣef ḥawla n yimuḍan yenṭerren, d unezgum ɣef twaculin. Tugart mi neẓra dakken d timrawin i yemmuten taggara-a ɣef ssebba n txessast n uksijin.

Yuɣ lḥal, tiɣsar n Bgayet d Amizur d tawilayt i tent-ixellsen. Tin n Sidi Ɛic d Agraw Ɛisat Meḥmud i tt-ixellsen. Ma d Xerraṭa, d aselway-anemhal amatu (PDG) n Sumam, mass Lunis Ḥamiṭuc, i yellan deffir tiɣin n tmacint-a, seld tallelt tadrimant tageεmirt i d-yefka ussan-a iεeddan i 22 n sbiṭarat n Bgayet, Tizi Uzzu d wanda nniḍen.

Ad d-nesmekti dakken segmu i d-iberreḥ Lunis Ḥamiṭuc s temεiwna-is i sbiṭarat, kkren yiɣermanen ssawalen i tiɣin n yifarisen (produits) n tkebbanit Sumam akken ad d-beyynen asteεref-nsen i urgaz-a.

Tura akka, iferru kra-kra uɣilif icudden ɣer uksijin, di leεḍil ad d-awḍen ɣer Tmurt Taqbaylit wallalen nniḍen i d-ceyyεen yiɣriben.