Timliliyin tiseklanin: yezzi-d umaru Mḥemmed Ḥasani ɣef yidlisen-is deg Uweqqas

Seld tuɣalin ɣer wannar, tesnubget tdukkla Azday Adelsan n Uweqqas, deg temlilit-is taseklant n sed 20 meɣres, amaru n temnaḍt-nni Mḥemmed Ḥasani.

Deg wawal-is dɣa, yuwi-d ɣef sin n yidlisen-is ineggura: ammud n tamedyezt “L’ivre citoyen” d wungal “Performance à Rocher Noir”, i d-yeffɣen di sin ɣer teẓrigin Boussekine n Bgayet, tazwara n useggas yezrin n 2020.

Ma nesmekta-d cwiṭ taḥawact n yidlisen-a, ammud n tmedyezt umi i d-yettwaεiwed yakan ujerri wis sin, yettmeslay-d ɣef umussu aɣerman d tlufa yezzin ɣef wassaɣen gar idles d tẓuri d yinaẓuren.

Ma yella d ungal, yella yeffeɣ-d deg Paris di tazwara n 2019 ɣur tezrigin MAÏA. Tebna abeεda teqsiḍt-is ɣef kraḍ n yinaẓuren i icerken timuɣliwin tidelsanin gar snat n temnaḍin. Sqerren ɣer taggara di temdint n Bumerdas, umi qqaren zik Aẓru aberkan (Rocher Noir). Ungal-a yessexleḍ gar umezruy n 1962 akked temsal timiranin.

Timlilit-a ḥeḍren-as wid iḥemmlen amaru d wid icedhan timlilit taseklant n Uweqqas, seld aseggas n lɣiba. Imi ɣer taggara, tella-d tnezzut-nsen s ubuddu. Ad d-nesmekti dakken ttnuzun yidlisen-a akka tura di tnedlisin, i win yebɣan ad iɣer akk ayen i d-uwin.