Amaynut di tira taqbaylit: ” timegraḍ yessawalen” d ungal amaynut n Tilyuna Su.

Tilyuna Su, s yisem-is idetti Suεad Cibut, d yiwet n tlemẓit i iqeddcen nezzeh deg wannar n yidles d tẓuri s umata.

Dɣa taggara-a tessuffeɣ-d ungal umu tefka azwel ” timegraḍ yessawalen “.
Aneggaru-a akken i t-id-yesbeyyin wezwel, yettmeslay-d ɣef terwiḥin n wid yettruḥun d asfel, d yidammen-nsen yettazallen di lbaṭṭel. ama d tirwiḥin n wid ur nuklal, neɣ n wid yettamnen bezzaf, neɣ ulamma d tid n wid yettwaḥeqren.

D ungal yeɣɣentren s yisental, yerna d win yesεan bezzaf n lemεani.
Ahat myal yiwen yezmer ad t-yegzu s wamek yettxemmim netta. D ayagi ahat i d iswi n tamarut, i iεemmden ad tili deg-s teɣɣentert n tektiwin.

Deg wungal-a, d Fulal i yenɣan amdakkel-is Marisen, lameεna ur ẓrin anda i t-yemḍel. Imi i yezri ddeqs n wakud,iban-d uẓekka-s, iban-d d ilem.

War ccek, win ara yeɣren ungal, ad yaf deg-s ula d tifelseft n wawal, ayagi imi tin i t-yuran d taḥeddadt n wawal.

I yisalli, Tilyuna Su ur telli d tamarut kan, besseḥ d tamedyazt, d tamesẓawant, d taselmadt n tmaziɣt daɣen.
D tin iḥemmlen tutlayt-is, tefka-s azal, terra-as-d wayeḍ.

Deg umecwar-is n tẓuri, tessuffeɣ-d kraḍ n yiḍebsiyen n ccna, amezwaru d ” lfusi lfusi ” i d-yeffɣen deg useggas n 2016. Wis sin deg useggas n 2017, tsemma-as ” igugem nnaqus.
Ma yella d wis krad, yeffeɣ-d deg 2018 isem-is ” Aẓru yettrun.

Seg tama-nniḍen, deg umaḍal n tira, tella tessuffeɣ-d tullist deg teẓrigin ” Achab ” umu tefka azwel ” Asikel “.

Tlul Suεad ass n 7 yennayer 1988, deg At Weɣlis, di twilayt n Bgayet. D tin yefkan azal i yidles-is, imi d axeddim-is i yettmeslayen fell-as.

Nukni seg tama-nneɣ nessaram-as afud igerrzen, ladɣa imi mazal-itt meẓẓi, ddeqs i mazal ad d-tmudd i teqbaylit-is.