Taɣuri i tga Massa tselmadt Lahdir Dalila i wungal “Tudert n tmara” n Naεima Benεezzuz
Taɣuri i tga Massa Lahdir Dalila ; d taselmadt n Tmaziɣt, i wungal Tudert n tmara n Naεima Benεezzuz
➡️ Ad d-nesmekti d akken ungal-a, yeffeɣ-d deg wayyur n duǧember n useggas n 2019, ɣer teẓrigin Busekkin deg Bgayet. Yesεa 163 n yisebtar i yebḍan ɣef 13 n yiḥricen.
Ɛawdeɣ taɣuri i wungal n Naima Benazzouz umi tefka isem : “Tudert n tmara”, mačči d taɣuri tamezwarut neɣ d tis snat i t-ɣriɣ, lukan ad t-qqareɣ kul ass ur εeyyuɣ ara deg-s. Γas akken yeččur d leḥzen maca d tamara-nni i d aɣ-ijebbden ɣur-s.
Ad d-fkeɣ cwiṭ tamuɣli-inu ɣef wungal-a :
- D ungal s wazal-is, ijebbed-d imeɣri ɣer tɣuri-ines, ladɣa imi d-yekka sɣur tin leεmer nekcim aɣerbaz. Ad neḥsu d akken imeslayen-is, frurin-d seg beqqu-ines d tebɣest akked leḥmala n tmarut i tira.
- Ayen yernan ccbaḥa ugar i wungal-a, d imeslayen-ines i icebḥen, i iweznen, i yesεan yiwen n wanya, amzun akken imeslayen-is xulfen wid n tmeslayt n yal ass. Ttḥulfuɣ tikwal deg kra n tseddarin, amzun d tamedyazt i qqareɣ.
- Ma nmuqel asentel n wungal-a “Tudert n tmara”, ad negzu d akken tamarut tewwi-aɣ-d ɣef leḥzen akked lmeḥna. Imi kra dagi akk d Ferruǧa i t-yesεeddan, yura deg twenza-s, axxam yettak-itt i wayeḍ !😢😢
- Amsawal deg wungal-a d aniri, imi tamarut ur tekki ara d awadem deg wungal, tettales-d s wudem wis kraḍ.
- Deg wayen yerzan tasiwelt ; abrid i teḍfer tmarut i wakken ad aɣ-d-teḥku ineḍruyen n teḥkayt, yella-d s umseḍfer. Tidyanin, teḥka-tent-id tmarut myuqqanent ta deffir tayeḍ, akken i tedda teḥkayt am snesla.
- Deg wayen yerzan aglam, yella s watas. S uglam, tamarut, tettak-aɣ-d isallen ɣef yiwudam akked udrar anda i d-tekker, d ayen i d as-yefkan ccbaḥa i wungal.
- Ayen i d ay-iεeǧben daɣen, tamarut tessaweḍ-aɣ ad nissin ɣas uma cwiṭ seg tudert d leεwayed n wid yettidiren deg sseḥra.
- Ttwaliɣ deg teḥkayt n wungal-a, am wakken asirem n Ferruǧa icuba ɣer usirem n tmarut, imi d tin leεmer nekcim aɣerbaz, teẓra acu teswa leqraya, tesbeyyen-d aya deg lebɣi n Ferruǧa ɣer leqraya n yessi-s !
- Imi yal tazwara tesεa taggara, akken daɣen ula d ungal-a yesεa taggara yessettrayen, yesseḥzanen. Ad ǧǧeɣ wid mazal ur t-neɣri, ad ẓren s timmad-nsen taggara n wungal-a.
Lahdir Dalila
