(Tiwlafin). Afɣanistan: Iṭalibanen hudden Axxam Aɣelnaw n Uẓawan rnan ḥettmen-d tarrayt-nniḍen n tudert

Segmi ṭṭfen Iṭalbanen ( les Talibans ) leḥkem di tmurt n Afɣanistan, kullec beddlen-as aselḥu.
Ladɣa ayen yemgaraden ɣef tektiwin-nsen.

Amedya ɣef waya, gedlen ɣef tlawin n tmurt-a i yellan tturarent di sinima, neɣ deg yisura, ad kemmlent axeddim-nsent. Armi wwḍent tneggura-a ugadent ɣef tudert-nsent.

Rnu i waya, ussan-a kan, kecmen i Wexxam Aɣelnaw n uẓawan, hudden ayen akk yellan deg-s. Ad d-nesmekti belli, axxam-a umu fkan isem ” Zohra “, sseqdacen-t yakan tlawin. Dɣa ur ǧǧin deg-s acemma, glan akk s wallalen ( instruments ) n uẓawan i yellan deg-s.

Seg tama-nniḍen, deg uḥric n usegmi aεlayan, ferqen di tesdawiyin gar tlawin akked yergazen i yellan deg yiwet n tzeqqa s iriditun.

Ayen i xeddmen akka Italibanen, ur yehwi ara akk i yiɣermanen n umaḍal s umata, ɣef leḥsab n yiwenniten-nsen deg yiẓedwan inmettiyen.
Ayagi imi ɣef leḥsab-nsen, ttwalin belli tameṭṭut di tmurt n Afɣanistan tuɣal war izerfan.