(Tiwlafin). Agni n Yiɣran: Bdan lecɣal n uheggi i tmenzit n Dda Sliman

Seld 38 n yiseggasen segmi i yemmut, xemmen yimezdaɣ i lecɣal n uheggi i tmenzit (stèle) n Dda Sliman Ɛazem deg taddart-is anda i d-ilul, Agni n Yiɣran, tadayra n Yiwaḍiyen, agezdu n Tizi Wezzu.

Dɣa, bdan yakan lecɣal imezwura ara d-yefken udem ɣef umḍiq anda ara tettwasbedd tmenzit-a d wayen ara d-teṭṭef d tallunt (espace). Ma d azemz, ur iban ara tura melmi ara temmag tejmilt-a.

lmend n waya, mgaradent tmuɣliwin n medden n temnaḍt-nni. Gar wid yumren s waya, imi Dda Sliman yuklal leqḍer, akked tkemmict n wiyaḍ i yettwalin belli tadrimt n uṣenfar-a ilaq ad xedmen s yes-s ayen ara d-yawin abaɣur i taddart. Seg tama-nniḍen, Llan wid yettwalin daɣen belli imḍebbren n tɣiwant εettlen nezzeh ɣef ccɣel-a.

I wesmekti, Dda Sliman yemmut berra n tmurt-is, acku yettwanfa deg-s, ula d aẓekka-s mazal ur t-id-wwin ara seg Tmurt n Fransa.