Amaynut di tira taqbaylit: ” Tirga ” d ammud n tmedyezt amaynut n Cebbiri Farida

Tesuffeɣ-d Massa Cebbiri Farida ammud n tmedyezt-is amezwaru, umu tefka azwel ” Tirga “.

I yisalli, ammud-a yeffeɣ-d ussan yezrin di teẓrigin Ccix Muḥend Ulḥusin.

Ad d-nesmekti belli, isefra yellan deg-s, llan wid i d-tugem sɣur yemɣaren d temɣarin-nneɣ. Imi, segmi i tella d tamecṭuḥt, Massa Cebbiri d tin yesεan lebɣi ad tissin, d tin yettnadin deg yiẓuran n yidles-nneɣ.

D tin yeffuden tamussni, tezga tettnadi fell-as. D ayen i tt-yeǧǧan dɣa, tefka azal meqqren i tmussni n At zik, tezga tleqqeḍ-d sɣur-sen isefra akked tmucuha.

Yuɣ lḥal, Massa Farida d tin yebdan almud n tmaziɣt deg yiseggasen n 90, dɣa tuget n tmussni-s teggi-tt-id sɣur tdukkliwin tidelsanin, am ” idles ” d ” tiɣilt-nneɣ “.

Nukni seg tama-nneɣ, nessaram-as afud igerrzen deg umecwar-is n tira s teqbaylit.