Iɣil Ɛli: Ugar n wayyur tura segmi qqimen yimezdaɣ war aman

Tadayra n Yiɣil Ɛli, d tin yettabaεen i twilayt n Bgayet. Am nettat, am temnaḍin akk n Tmurt n Leqbayel, sεant ugur deg waman.

Yuɣ lḥal, ɣas yella lexṣas di temnaḍin-nniḍen, ur tettelḥaq liḥala-nsen i tin n tɣiwant n Yiɣil Ɛli. Amedya, di taddart n At Sasi, ugar n wayyur tura segmi qqimen yimezdaɣ war aman.

Γef leḥsab n tnagiwin-nsen, mačči d aman i ixuṣṣen. Meεna d axeddam ara ten-id-yerran. Γef usentel-a dɣa, llan wid i aɣ-d-iwekkden belli win yellan ixeddam yakan uqbel, yeffeɣ lanetrit.

Ad d-nesmekti belli, arraw n tɣiwant-a di teswiεt-a, ttaɣen-d aman n useqdec d lbiε. Γef leḥsab n wayen i aɣ-d-nnan, tasitirt ( taqellalt ) n waman n 1000 n Llitrat s 1500 n Yidinaren. Mebla ma nettu, aman n tissit llan ttaɣen-ten-id yakan acḥal-ayagi, acku wid i d-yettruḥun deg iteyyuten ur sliḥen ara i tissit.

Addad-a ideg ttidiren, yesserkeb-asen zzεaf d ageεmir, ladɣa imi ur d-iban tiqqit ɣef melmi ara asen-d-uɣalen waman.