Amaynut di tira taqbaylit: ihegga-d Mwayessi Neǧmeddin ungal d amaynut
Mwayyesi Neǧmeddin, d yiwen ilemẓi iqeddcen nezzeh deg wannar n yidles akked tsekla tamaɣiɣt.
Γas ma yella meẓẓi di leεmer, meεna tigzi-s d lebɣi-s i tmussni tugar iḥemmalen n waman.
D anelmad deg tesga n tutlayt d yidles n tmaziɣt di tesdawit n Bgayet, aya yerna-s lebɣi i mmi-s n Wertiran aɣir n ṣtif, yezga d anadi, d aḥebber ɣef tegbalut n tmussni deg wayen icudden i tutlayt-nneɣ.
Yuɣ lḥal, yekcem ula deg umaḍal n tɣamsa, yeḥrez deg-s amḍiq-is. Dɣa yura ddeqs n yimagraden, i d-yeddan deg udlis-is ” Fehmet-iyi ttxil-wat ” i d-yessuffeɣ ɣur teẓrigin Ccix Muḥend Ulḥusin.
Ilemẓi-a, d imeɣri i yettaken azal meqqren i yidlisen i yettwarun s tutlayt tamaziɣt, yezga yeqqar-iten, ixeddem-asen adellel. Neɣ ma nezmer ad d-nini, yessebɣas kra win yellan d amaru.
Rnu i udlis-is amewaru i d-yessuffeɣ deg useggas n 2022, iberreḥ-d umaru Mwayessi Neǧmeddin ɣef umaynut-is n tira i d-ihegga. Dɣa d tasuqqilt i yexdem i wungal i yettwarun s tutlayt taglizit Charlie and the chocolate factory” ɣer teqbaylit.
Ungal-a dɣa, yerza igerdan imecṭaḥ.
Ha-t-aya d acu i d-yura fell-as.
📓D tasuqqilt n wungal “Charlie and the chocolate factory”, n umaru “ROALD DAHL”.
Semmaɣ-as s teqbaylit “ČAṚLI AKKED LUZIN N CAKULA”.
⏩UNGAL-A, DI TAZWARA D TAJMILT I “MUḤYA”. SYINNA I KRA N WIN I IQEDCEN, I IQEDDCEN ƔEF TUTLAYT-NNEƔ.
Yesεa 190 n yisebtar (format: 14/22). Sdaxel-is kra n tewlafin.
⏩Ayen i yi-yeǧǧan ad d-suqqleɣ ungal-a, d lixsas i yellan di tsekla-nneɣ deg tewsit-a; tasekla n yigerdan. Rnu ɣur-s, tutlayt taɣbalut (la langue source), tusa-yi-d teshel, d taneglizit d tafsast kan, imi yerza igerdan. Nnig n waya, d ungal i yeččuren d timsirin i yigerdan, yettṛebbi.
Ɣer taggara, sarameɣ ula d asaru-ines, ad yeqqel s teqbaylit. Dɣa d ayen i d-ttheyyiɣ tura; syinna ad d-waliɣ wid terza temsalt, amek ara nerr asaru-nni s teqbaylit.
⏩AWAL ƔEF WUNGAL:
Ungal “ČAṚLI AKKED LUZIN N CAKULA”, yeffeɣ-d aseggas 1964 deg tmurt n Marikan, sɣur “ROALD DAHL”.
Aseggas 1971, yeffeɣ-d d asaru (film), εawden-as asufeɣ i usaru-nni, aseggas 2005.
D ungal i yigerdan. Asmi i d-yeffeɣ tikkelt tamezwarut, yelḥa aṭas, yewweḍ almi d timura n Lurup.
⏩GM. Asufeɣ n wungal-a, mazal. Imi llan kra n wuguren, gar-asen:
– Tadrimt n usufeɣ: Ɣlay mliḥ lkaɣeḍ tura.
– Izerfan n tsuqqilt: Ilaq alamma wwiɣ-d ttesriḥ sɣur tiẓrigin ɣur d-yeffeɣ wungal i d-suqqleɣ.
Sarameɣ ad yili ttawil, akken ad t-id-ssufɣeɣ sya ɣer sdat.
#ITRI_FURAR_2023
Nessaram-as afud igerrzen i umaru-a deg umecwar-is n tira.
Am akken i nessaram ad d-yeffeɣ umaynut-is s uɣiwel.
