Awal ɣef umaru Larbi Yahioun akked udlis-is amaynut ” uḍan n tziri”

Larbi YAHIOUN d aselmad n tutlayt d tsekla taqbaylit. Yura yakan 4 n yidlisen : «Tayri n umedyaz» (2014),  «Lewsaya n baba» (2015), «Abrid ar ukayad n Tmaziɣt» (2015) d «Taqbaylit, iles d yidles» (2016). Nnig n waya, yelha-d d leqdic yeddan deg ubrid n usnerni d usbuɣer n yidles s tira.
   Nezmer ad d-nini seg asmi i yerfed imru, netta yezga d amennuɣ akked yisekkilen-is , ɣur-s tira d tamacahut ur nesɛi taggara.

Deg wayyur-a yezrin yeffeɣ-d udlis-is wis 5 s uzwel “Uḍan n tziri” d tasuqilt n “les nuits blanches” n umaru arusi  F-Dostoïevski ɣer teẓrigin Talsa.

Imeɣriyen s ccuq d tumert i mugren adlis-a ladɣa imi d-issebgen uzwel d akken mačči d tasuqilt-nni n “wwet ɛeddi”.
Mass L-Y yefka-d akk tizemmar-is akken ad yeǧǧ ccbaḥa n usenfali akken tella di tutlayt-nni dɣa dagi ad tḥulfuḍ belli yella-d usnulfu .

Taqsiṭ n wungal-a tezzuḥeb imeɣri ɣer yirebbi n tedyanin . Ha-tt-an ihi tmuɣli n yiwet n tmeɣrit ( Taderwict n at laxert) :

Di tudert llan aṭas n yemdanen yal yiwen yemxalaf ɣef wayeḍ.
Yella umdan ad ak-yekksen tudert, yella win ara ak-id-yerren ɣer tudert, yella wayeḍ d amsebrid kan… Acu kan win yuɛren d win ara k-id-yerren ɣer tudert, ad d-yessaki iḥulfan  yemmuten deg-k i tikkelt nniḍen,neɣ ahat i tikkelt tamezwarut, ɣer taggara ad ak-yeǧǧ d awḥid ,ad tuɣaleḍ alama d ansi i d-tekkiḍ si tazwara, ɣer wuḍan-ik berriken ,ɣer tirga-nni i terriḍ d tilawt tettiḍireḍ deg-sent kečč ur telliḍ seg-sent…

  📚 Tukkist seg udlis Sb 63/64 :

  D ass yennuɣnan yerna-as ageffur,sellaw am tewser-nni i aɣ-yettrajun. Tiktiwin tiwerdaniyin tturarent deg wallaɣ-iw; d iɛewwiqen, d idrugen ideg ur friẓeɣ kra . D isteqsiyen i wumi ur sɛiɣ la tazmert wala lebɣi akken ad asen-d-afeɣ tifrat. Ala , mačči d nekk ara yefrun akk timukrisin-a . Ur nettemwali ara ass-a. Iḍelli, mi akken i nemsebḍa, tignewt idel-itt usigna, yebda-d wagu . Nniɣ-as azekka ad ixser lḥal. Ur yi-d-terri ara imir-nni, syin akkin tenna-yi-d :
Ma yella d ageffur, ur nettemlil ara,ur d-ttaseɣ ara.
Sarmeɣ limer ur d-tettarra ara lbal-is ɣer ugeffur, maca xas akken, ha-t-an ur d-tusi ara . D ttiɛad-nneɣ wis tlata, d iḍ-nneɣ wis tlata ddaw n tziri…

Ssarameɣ taɣuri yelhan i wid ara yeɣren adlis-a.

Sɣur iman Taqbaylit.