Amaynut di tira taqbaylit: Yessuffeɣ-d uḥeddad n wawal Mbarek Gamar sin n wammuden n yisefra

Sin n wammuden n tmedyezt i d-yessuffeɣ ɣef tikkelt ussan-a umedyaz Mbarek Gamar. Γef leḥsab-is dɣa, yiwen deg-sen d isefra wezzilen, umu yefka azwel ” ɣas wezzil ad d-yawi kra “. Ma yella d wis sin d isefra ɣezzifen, umu isemma ” tiggugemt yessawalen “.

I yisalli, Dda Mbarek akken i as-qqaren tuget n wid i t-yessnen, seg yimedyazen iẓewwren i d-turew Tmurt Taqbaylit. Aneggaru-a d win ttqadaren akk imedyazen, ttεuzzun-t, imi yezga i lmendad n kra n win i as-yesran. Yuɣ lḥal, ula d tamedyezt-is tettmeslay fell-as, imi d tin zeddigen am waman.

Ma nemmeslay-d ɣef tayri i yesεa i tmedyezt, Dda Mbarek tekcem-as ɣer yidammen-is.

D tidet, yefka-s azal i tmedyezt, yekcem s annar-is ifren-itt. Lameεna ula d nettat ur teffir fell-as lbaḍna-s, dɣa tesmar-as-d seg tehrekt-is ( inspiration). Ayagi dɣa, iban-d am tafukt deg yisefra-s i yeččuren d awalen iweznen, icebḥen.

Win yeɣran tamedyezt n Dda Mbarek dɣa, ad yaf deg-s tezdeg, tamussni, laεqel, akked teḥdeq. S ugzul n wawal, tamedyezt-is d aɣerbaz i win yebɣan ad yessin.

Ad d-nesmekti belli, Dda Mbarek d imḍebber n tezrigin Ccix Muḥend Ulḥusin.

Ma yella deg umecwar-is n tira, yella yessuffeɣ-d yakan ammud n tmedyezt, deg useggas n 2016, umu yefka azwel ” 99 d asefru “.

Di taggara, nessaram-as afud igerrzen, tazmert igerrzen, d tudert iḍulen i mmi-s n At Yettura.