Tazmert: issin semmus n yisufar i yettqeεεiden addad n yidammen
Tuget n medden di tallit-a, ttidiren leḥriṣ seg myal tama di tudert-nsen n myal ass. Daymi dɣa, i d-yennulfa myal aṭṭan.
Seg waṭṭanen i mucuεen nezzeh di tallit-nneɣ, d win n waddad n yidammen (tension artérielle ). Yuɣ lḥal, zik, ala imeqqranen di leεmer i t-yesεan ugur-a. Meεna tura, ula d ilemẓiyen ur sliken ara deg-s, ttnaɣen yid-s myal ass.
Akken i neẓra, win umi yuli waṭṭan n yidammen-is, yezmer ad as-d-yesnulfu ddeqs n wuguren-nniḍen di tezmert-is. Ama, deg ul-is, imi yezmer ad yeḥbes srid ( crise cardiaque ). Neɣ di tmuɣli-s, i yezmer ad yeṣruḥ ma yella yuli waddad n yidammen-is. War ma neṭṭu,uguren n nnefs, d wid n tgeẓẓal daɣen.
Γef waya, neεreḍ deg umagrad-a newwi-awen-d kra n yisufar i ilaq ad tessqedcem deg useggi-nwen. Acku, d ayen ara awen-d-yawin abaɣur d ageεmir i uqeεεed n waddad n yidammen-nwen, d tezmert-nwen s umata.
1) Tiskert (ticcert)
I kra n win ur yessexdam tiskert deg tuččit-is, ad as-iniɣ tɣellḍeḍ deg leḥsab-ik. Imi tiskert, seg yisufar i yessenqasen addad n yidammen, terna tettεawan idammen i wakken ad lḥun akken ilaq di tfekka. Neɣ s unamek-nniḍen, tesεa ayen umu neqqar (l’allicine), d nettat i yettεawanen idammen.
2) Aẓalim (lebṣel)
Lebṣel yettεawan nezzeh, imi yesεa ayen umu qqaren ( antioxydants ). Yuɣ lḥal, aẓalim yettεawan ul i wakken ad yili deg tezmert ilaqen, akken ur ixeddem buhan. Daymi dɣa, i yettenqas fell-as leḥris d tteqlaq.
3) Lqerfa (canelle)
Akken i tettεawan deg uqeεεed n waddad n yidammen, tettεawan daɣen deg usider n ssker deg yidammen. Γef waya, d lεali ma yessexlaḍ-itt yiwen i tuččit-is d tissit-is.
4) Zzaεter n lexla (origan)
Am nettan am lebṣel, yettεawan ul, yettqeεεid addad n yidammen.
5) Zzit uzemmur
Zzit uzemmur, yessadar addad n yidammen n wemdan, yettqeεεid-it daɣen. D ayen i yeǧǧan imezwura-nneɣ ṭṭfen deg-s, imi ẓran abaɣur-is.
Isufar-a, llan deg uxxam n myal yiwen deg-neɣ. Ɛerḍem tuččit s yes-sen, twalim amgarad ara yilin. Rnu i lbenna i d-rennun i tuččit, abaɣur-nsen yif lbenna-nsen.