Tadawsa: issin 10 n yisallen ɣef ubaɣur n umezzir. Acimi i ilaq ad tesεuḍ amezzir deg uxxam-ik?

Amezzir, d yiwet n teḥcict i yesεan abaɣur ameqqran i tezmert n wemdan. Ama akken d azegzaw neɣ yegga.
Γas ulamma llan wid i t-yesseqdacen, ẓran belli yelha nezzeh i tezmert n tfekka. Llan wiyaḍ, ahat ur t-ssexdamen ara akk, imi ur ssinen lfayda-s.

Γef waya i neεreḍ deg umagrad-a, newwi-awen-d isallen ɣef ubaɣur n umezzir i wemdan.

1) I wid yesεan ugur n yeɣsan (rhumatisme):

Ma yella telliḍ seg  wid yesεan ugur-a, zzit n umezzir yessenqas nezzeh leqriḥ n yiɣsan. Ddem-d zzit n umezzir, tlettfeḍ s yes-s tafekka-k, imi zzit-a yettεawan daɣen deg leḥḥu n yidammen s sshala deg yiẓuran, am wid n yifassen d yiḍarren.

2) I wid yesεan ugur n ukewwer n tεebbuḍt

Amezzir seg yemɣan i yelhan nezzeh, ama i leqriḥ n tεebbuḍt neɣ i userreḥ-is.
Ma yella tḥulfaḍ i tεebbuḍt-ik teqreḥ-ik, neɣ teqqur.
Neɣ ma teqqimeḍ ddeqs n wussan taεebbuḍt-ik ur tserreḥ ara. Ddem-d kra n yiferrawen n umezzir azal n teflut tamectuḥt, ssired-iten akken iwata, tegreḍ-ten deg waman irekmen yakan. Eǧǧ-iten akken deg waman-nni azal n 10 temrac, tesweḍ-ten. Tzemmrem ad teswem seg sin armi d 3 n lkisan i wass. Lameεna, ur ilaq ad tεeddim tilisa, imi imɣi-a s buhan yettḍurru.

3) Mgal tteqlaq d εeggu:
Amezzir seg yemɣan i d-yessrusuyen iḍes. Lkas n umezzir myal tameddit yettaǧǧa allaɣ n wemdan ires, daymi i yettishil fell-as yiḍeṣ. Ula d tiktiwln-is, d uxemmem-is ad rsen daɣen.

4) Yessemɣay-d acekkuḥ:

Ma yella win yesεan ugur n unṣal n ucekkuḥ, amezzir d tifrat lεali. Yewwi-d ad tegrem amezzir deg waman, ad ten-tessrekkmem akken lwaḥi i kra n wakud. Aman-nni dɣa, ccucfem s yes-sen. Ula d tiyemmatin-nneɣ, mazal ar ass-a ssirident acekkuḥ-nsent s umezzir. Γef leḥsab n tnagiwin-nsent, amezeig daɣen yesseqway acekkuḥ, ur yettentag ara.

5) I leqriḥ n uqerruy idumen (migraine):

Seg imir-a ur ttqelliq ma yella tesεiḍ leqriḥ n uqerruy. Ddem-d cwit n umezzir, sserkem-it deg waman, kkes-d aman-nni, εell-iten-id sdat-k, tɣummeḍ aqerru-k akk s ucettiḍ, i wakken ad d-yali lefwar n waman-nni irekmen i uqerruy-ik. Kra n wakud, ad ttwaliḍ amgarad.

6) Igerrez i tkatut

Igerrez mliḥ umezzir i tkatut, win itessen amezzir, yesεa takatut yelhan, ur itettu s sshala. Seg tama-tayeḍ, wekkden-d wid yessnen deg yemɣan belli, amezzir yelha ula i tegzi, d uḥraz n tsilulin n tkatut.

7) Yelha i win yesεan inehhij

I wid yesεan uguren n nnefs, neɣ anehhij (asthme),  neɣ uguren n leqriḥ n yedmaren, am wid yewwet waḍu. Amezzir yettserriḥ i yiteyyuten n nnefs(voies respiratoires).

8) Yelha i tasa d tgeẓẓal:

Amezzir igeddel aṭṭan n tasa, imi yesseḥbibir ɣef tsilulin-is (cellules hépatiques), yettqeεεid-itent daɣen. Seg tama-nniḍen, amezzir yettεawan tigeẓẓal deg uxeddim-nsent.

9) Yelha i ccbaḥa d ssfawa n uglim:

Imi yetturar nnuba meqqren deg uḥraz d useḥbiber ɣef tsilulin n uglim. Amezzir yettarra aglim d acebḥan d aleqqaq, acku igeddel temɣer n tsilulin ( vieillissement cellulaire).
Γef waya dɣa i ccucufent s yes-s tlawin n zik.

10) Seg yisufar i  nesseqdac deg tuččit

Rnu i ubaɣur-is, amezzir yessebnin tuččit, tzemmrem ad teggarem cwit seg yiferraw-is i tuččit-nwen. Yettak-as lbenna d rriḥa d tixlafin. Xeddmen-t daɣen i yiɣi, i wakken ur yettḍurru taεebbuḍt.