Azleg asemhuyan: issin amek i d-ibeddu d wamek ara teḥluḍ ma yella tuḍneḍ-t.

Deg tmeshuyt(saison)n tegrest, aṭṭan amezwaru i yettḥazen amdan d azleg (grippe).
Γef leḥsab n tuddsa tamaḍlant n tezmert (organisation mondiale  de la santé – OMS), myal aseggas ugar n Umelyar n yemdanen i ihellken azleg neɣ abeḥri deg umaḍal s umata. Deg-sen azal n 3 armi d 5 n yimelyan d wid yettenṭerrayen nezzeh.
Deg yineggura-ya 290 000 armi d 650 000 tettmettaten s ugur n nnefs, ladɣa imɣaren yesεan ugar n 60 n yiseggasen, imuḍan yesεan aṭṭanen idumen( maladies chroniques ),  tilawin yellan s tadist,  akked warrac imecṭaḥ i yesεan s ddaw n 5 n yiseggasen.

Γas ulamma di tamurt n Lezzayer acraḍ myal abeḥri yettili myal aseggas deg sbiṭarat, yerna mebla lexlas. Meεna llan kra n yemdanen ur cerrḍen ara. Dɣa ad d-nesmekti kan belli win icerḍen, ɣas iḥuza-t waṭṭan ur t-yettḍurru ara nezzeh am win ur necriḍ. Daymi ilaq wid yuḍnen lehlakat idumen ad d-cerrḍen mgal azleg.

Amek i d-ibeddu waṭṭan-a?

Amdan ma yella ikcem-it-id uvirus-agi

1) Ad yettḥussu i  yiman-is yeεya war ma yexdem ula d kra, neɣ yefcel  dgedgen akk yeɣsan-is. Llan wid yeṭṭawḍen anda ur ttizmiren ara ad d-kren seg usu.

2) Ad yesεu tawla n usemmiḍ, ad yebɣu kan ad teḥmu tfekka-s. Rnu tissit n waman war aḥbas. Tawla-ines tezmer ad taweḍ armi d 40°. Neɣ ɣas ma yella ur yesεi ara tawla, ad izeɣɣeb uksum-is ad d-yettḥulfu i usemmiḍ.

3) Tusut neɣ leqriḥ n tgerjumt. Ahat di tazwara ad d-yebdu s leεṭib n tmiǧǧa ssin akkin ad yettusu, imi d idmarin-is i ihelken. Dayen izemmren dɣa ad as-d-yesnulfu uguren n nnefs.

4) Leqriḥ n uqerruy: amdan ihelken ad yettḥulfu i uqerruy-is d amaẓay, ur yezmir ad t-id-yerfed. Ula d allen-is ad yewεer fell-as ad tent-id-yeldi. War ma yeslek seg leqriḥ n uqerruy-is.

5) Ad yesruḥ lebɣi i tuččit, neɣ ad as-iruḥ uburdu. Yal mara iwali tuččit ad yebɣu ad d-yerr. Llan wiyaḍ ttaran-d akk ayen i ččan.

Amek ara ḥadreɣ iman-iw.

1) Yal mara ad terzu tasmuḍi tettawi-d yid-s aṭṭan-a, daymi amdan ilaq ad yettḥadar iman-is, ad yettlus lqec akken ad teḥmu tfekka-s ur t-yekkat waḍu.

2) Seg tama-tayeḍ yewwi-d ɣef yemdanen ad ssizdigen iman-nsen d yexxamen-nsen, ad tessen ayen yeḥman ad tetten tuččit tamesbaɣurt.

3) Ur ttqerribeɣ ɣur umdan yuḍnen, imi aṭṭan-a d win iderrεen.

4) Ad xeddmeɣ takmamt mara ffɣeɣ ɣer berra.

Amek ara ḥluɣ ma yella uḍneɣ:

Llan wid ur nesra i tirzin ɣer umsujji, ḥwaǧen kan asteεfu, tuččit lεali akked tuččit taqerḥant, tissit n waman n kra n yemɣan am tizana d lqares, nneεnaε. Asṭuqqet n teskert d lebsel.Llan wiyaḍ, ur ḥellun alamma rzan ɣur umsujji ad asen-d-yefk ddwa ilaqen.

Di taggara ad awen-d-nini, tazmert-nwen gar yifassen-nwen ttḥadarem-tt.