Tukkist seg wungal  “Asmekti ” n Samira Ḥusini Benεebdelmalek

Ẓehra, telha-d d ddunit-is ; sut uxxam, lhant-d yid-s ; kra tt-ẓerrent akken, yettzad deg-sent ucayaḍ. Tismin, zadent deg-sent, rennunt. Usment ɣef lemḥibba d wazal tesɛa ɣer urgaz-is d yimɣaren-is, usment ula s wayen i as-d-yefka Rebbi amzun akken d lmektub-nsent i asent-tekkes ! Tameɣbunt mm nniya, teɣli-d gar sut tḥila.

Nettat, tbubb azembil n ddunit ; nutenti, gant-tt d taεekkunt, ttrağunt melmi ara tt-wεunt, ad d-sersent annar-is. Mm umzur awraɣ, yefka-yas Rebbi ur icuḥ ; tahuski yerna imudd-as-d dderya ifazen, ma twalad-ten ad tɣilleḍ d Irumyen, yuɣ lḥal d ccetla n zzin, xewlen, cetlen am lexwal am yimawlan. Ihi, kra akken ttwalint deg-s tid ur nuggad axelleq, ḥerrqent, ḥesdent-tt di ticki-s. Netta, yefka-yas-d ; nutenti, bɣant ad tt-kksent ad rnunt amur-is. Tinuḍin-is, sdukklent tiqerra, mxawint ɣef Ẓehra ad tt-suffɣent di ddunit nettat d tara-s.

Ass amcum yewweḍ-d, kraḍ n wussan kan degmi i d-tesεa Tasedda, sewwent-as tagella, fkant-as tečča. Mi yewweḍ lqut ɣer tεebbuḍt-is, isud-d fell-as waḍu n tselbi, yeddem-itt. Tameṭṭut, imir, tbeddel ṣṣifa ad as-tiniḍ d lweḥc n lɣaba seg wakken tenhewwal. Leεqel, yennejla. Allen, ur friẓent acemma ala dderya i d-teğğa. Yiwen n wass, Ẓehra, izad fell-as lehlak, la teshetrif kan, ayen texdem ass-nni, win yesεan anziz n leεqel ur t-iteg, ma d win iwumi yufeg ugermus, aḥlil ! Ihi, teddem arraw-is ɣer texxamt terna ajenwi teɣleq-d fell-asen tawwurt s usekrun, syin tebda timezla n tasa-s wa deffir wa. Asuɣu n warrac, yewweḍ at uxxam d lğiran, uzzlen-d ad walin dacu yeḍran ! kra i as-ssawalen ur asen-d-tesli, teεqel kan dderya-s d ujenwi i yellan gar yifassen-is. Teṭṭef amenzu, tekkes-as ixef, terra-t di rrif syin akkin tqeddem ɣer wis-sin teccelqef-it, tcelleḥ-it deg umgerḍ-is ; mi twala idammen ffɣen-d deg-s, tḍegger-it akkin. Akken tefka asurif ɣer Tsedda dɣa imir kan ha-t-an rẓan-as-d tawwurt-nni n lluḥ, menεen-tt deg ujenwi.

Yiwen seg warrac-nni, ur yelli wacu ara twaliḍ deg-s, icuba izimer-nni n lεid tameqqrant ; tafekka, deg lqaɛa ; rruḥ, yewweḍ bab-is, mi t-refden teɣli-d tubbit n teḥbult n tmellalt (tabaɣrirt) seg yimi-s, ma d wis-sin ddmen-t s lemɣawla ar sbiṭar, yeṣṣer-it Rebbi, tarwiḥt-is tejgugel di tudert tenteḍ deg-s. Tasedda, ur tuki i wacemma, ur tefhim kra ; lmuluk yellan deg-s, jebrent-tt, ḥuddent-tt, ma d ṣṣura-s teččur d idim, tcuba taqeṭṭit u uksum. Aass- nni amcum, temneε, ma d lemḥani imir i as-nnant mreḥba, lεeslama.

Yekker uferfud di taddart, d ayen ur yezmir wallaɣ ad t-id-yessugen, wama ad yettwaxdem, d lmuḥal akkya, abbuh, anta tayemmat yezlan tarwa-s ! Degmi d-teḍra twaɣit, Ẓehra, tewwi-tt ddula ɣer uxxam n yimeslab, teqqim-n dinna almi teḥla. Asmi tt-id-yeqqel leεqel, ur tumin ayen texdem, ur yeqbil wallaɣ-is anect-nni yeḍran d warraw-is dɣa din din yeḥbes wul-is. Yiwet n teswiεt, texbabeḍ, tewweḍ ɣer wanda ara naweḍ, teğğa-d sin n yigujilen, ad ten-ččen lewḥuc, ur neččur ul-nsen d Rebbi, wid-nni yesderɣel leḥsed d tismin, ferrqen tasa d wayen turew yir faruq, suffɣent-tt di ddunit akken ur ffiɣen lmumnin, ḍefren lfani, ttun Rebbi, ur gzin ara belli win yettwalasen ad ixelles, ass-a neɣ azekka.

Samira Ḥusini Benεebdelmalek. D tukkist seg wungal : Asmekti, tidyanin d txidas. Isebtar : 52-55. Tiẓrigin : Imal. Yulyu 2023.

Σabdennur Ḥamituc. Tasnawit n Σebderreḥman Busaεa. Adekkar.