Issin 10 n yiwellihen mgal tteqlaq

Sdat tudert n wemdan i yeččuren d uguren, d inezgumen, akked yiεewwiqen n ddunit yemgaraden. D agaman ad yeṭṭef umdan tteqlaq d lḥir.

Lameεna, tteqlaq-agi d iswiren, yella win ur nettḍurru, acku d aḥulfu kan i d-yettεeddayen seg tikkelt ɣer tayeḍ.
Yella wayeḍ, yezmer ad iḍur amdan, ad t-yeṣṣaweḍ ɣer lmuḥal. Aneggaru-a, ixelleq-d deg umdan myal aṭṭan. Am win n ujeεbjb, leqriḥ n uqerruy, akked yir ttexmam. Yettdemmir-t i wakken ad yeεzel iman-is, ad iɣuc akk ayen i as-d-yezzin.

Amek ara teẓreḍ belli tettqellqeḍ?

-Ma tḥuṣṣeḍ i wul-ik yekkat ugar n leεwayed-is war ma tεelleḍ tiqqit.

-Ma tesεiḍ tidi taṣemmaḍt.

– Ma tḥulfeḍ i tεeqqayt deg tεebbuḍt-ik, amzun tegdel fell-ak nnefs.

– Ad d-bdunt yir tiktiwin ad tezzint ɣef uqerruy-ik.

– Ma tḥuṣṣeḍ i yiman-ik ur tgerrẓeḍ ara, ad tebɣuḍ kan ad teqqimeḍ i yiman-ik ad tettruḍ.

Ayen i d-nebder tura, d cwit seg wayen i yessεedday wemdan yesεan tteqlaq, wamma llan wiyaḍ ttawḍen ɣer lmuḥal.

D umagrad-a dɣa, neεreḍ newwi-awen-d kra n yiwellihen ara ken-iεewnen mgal tteqlaq.
Acku llan wid iregglen fell-as s tissit, neɣ s ukeyyef, ayagi dɣa d timerniwt n lmazut i tmes.

1) Belleε allen-ik, tegreḍ nnefs ameqqran seg uxencuc-ik, tessuffɣeḍ-t-id seg uqemmuc-ik azal n kraḍ n tikkal.

2) Xdem addal:
Ma tḥuṣṣeḍ i yiman-ik tettqellqeḍ, azzel, ddu, lḥu, neggez, xdem addal. Awid ukan ad texdem tfekka-k, ad yexdem yid-s wallaɣ-ik.

3) Smuzget i uẓawan:

Aẓawan d ddwa n tteqlaq, ffeɣ ɣer lexla, cnu s ṣṣut aεlayan. Ssuffeɣ-d akk afud n diri yellan deg-k. Ttru ma tebɣiḍ, εeggeḍ, ad tbeddel fell-ak tegnit.

4) Taɣuri n yedlisen
Taɣuri tessekcam allaɣ deg umaḍal-nniḍen, s yes-s ad yedhu wallaɣ, ad yettu ayen i t-iceɣben.

5) Aru, hder, ssuneɣ, ccdeḥ

Meḥsub, am tɣuri, allaɣ-ik ad yessedhu iman-is s yiman-is, ad tessuḍ tiktiwin-nni n diri i k-yerwin.

6) Bru-as i tefrit-ik tikwal:

Tafrit izaden ɣur kra n medden, ɣas ulamma dayen igerrzen, lameεna tikwal tettḍurru daɣen.
Acku imir-n ikeccem wemdan deg ddeqs n yesteqsiyen, acimi akka mačči akka? Iwacu i teεwej temsalt-a, ayɣer i mgaradent tlufa-a. D yesteqsiyen-nniḍen i ugar n tmussni.

Ihi tikwal yelha yiwen ma yebra-as i tefrit ad yerr iman-is d aεeggun deg kra n tegnatin.

7) Efk-as i tfekka-k azal-is n usteεfu

Gen di lawan, ur ḥerreṣ ara iman-ik buhan, ečč ayen yelhan. Ffeɣ i teẓgi, i teftist, rzu ɣer tmur-a nniḍen. Issin imdanen imaynuten, crek yid-sen adiwenni.

8) Xemmem ɣef win i tḥemmleḍ

Ma twalaḍ iman-ik tettqellqeḍ, ddem-d asawal-ik ssiwel-as i win εzizen nezzeh fell-ak, yemma-k, gma-k, amdakkel-ik, tamdakkelt-ik…
Mmeslay-as, ini-as ɣef wayen i k-iceɣɣben.

9) Nezzeh asaru:

Asaru s usinaryu igerrzen, d tifrat mgal tteqlaq, deg-s ad tedhuḍ, deg-s ad yedhu wallaɣ-ik, ad ak-yeffeɣ utqelleq.

10) Mqabel udem i wudem kečč d tilawt:

Ayen i d-nebder yakan yelha mgal n tteqlaq, lameεna tifrat n tidet d amager n tilawt s tilawt. Qenneε iman-ik belli ddunit tebna ɣef wayen yelhan d wayen n diri. Ssegzi iman-ik belli ass-a i kečč azekka mgal-ik.
Ḥṣu belli akken i tella taḍṣa i yella imeṭṭi, akken i tella talwit i yella ccwal. Syin akkin kullec ad as-yezmir wallaɣ-ik.