(Tiwlafin). Bgayet: imukan n tmerrit n Zzigwaṭ deg yir liḥala

Seg yidigan icebḥen nezzeh di twilayt n Bgayet, d win umu qqaren Zzigwaṭ (les aiguades). D tahuski war tilas i yellan deg-s, imi tessur ccbaḥa n tezzegzewt n tẓegwa, akked tin n waman n yilel. Mebla ma nettu, ccbaḥa n yidurar i as-d-yezzin.

Limer ur yekcim deg-s uḍar n wemdan, ilaq abeḥri-s aṣemmaḍ, d waman-is izedganen, ad sseḥlun myal aṭṭan. Meεna imi i yezga yettruḥu ɣer dinna, ass-a yuɣal wemkan-nni d ayla n ugudi. Neɣ s unamek-nniḍen, d agudi i yuɣalen yezdeɣ iberdan-is. Anda i yedda yiwen, ad yaf aεerrim deg-s.

Ma nemmeslay-d ɣef tqerεatin n lbirra, d iqenṭaren deg-sent i yenḍeggaren dagi d dihin. Ur teslik lqaεa, neɣ d lehwa, ula d aman glan s yes-sen.

Seg tama-nniḍen, tickarin n plastique ssant ɣef lqaεa am yiεeqqayen uzemmur. Yal win yeččan tuččit-is, ad yeǧǧ lewsex deg wemkan-is.

S ugzul n wawal, tawennaḍt i asen-d-yefkan myal lxir i yemdanen, ama d nnefs azedgan, ama d ccbaḥa s wacu tekksen ɣef wulawen, ama d igumma d tidal. Ass-a rran-s tajmilt i ur tuklal, ssemsexen-tt , ḍurren-tt war ma gzan belli d iman-nsen i ttḍurrun.

Di taggara, ad d-nger tiɣri i tdukkliwin n twennaḍt akked wid teεna temsalt, ad xedmen ayen ilaqen, ad gedlen adegger n uhicur deg-s. Amer ahat ad as-d-tuɣal tudert-is i tikkelt-nniḍen.