(Tazmert). walit 10 n yiwellihen ara ken-isellken seg tuḍna n tεebbuṭ deg unebdu-a.

Yal mara d-yerzu unebdu, yettawi-d yid-s myal lxir. Ladɣa, deg wayen yeεnan leṣnaf n yigumma i yettilin deg-s. Ama d lexrif, lberquq, delleε, afeqqus, d wayen-nniḍen.

Dɣa, amdan s umata, iteddu deg lebɣi n lebɣi-s, ur yezmir ad yeqqim war ma ifareṣ tuččit n wayen iḥemmel deg-sen. Lameεna, seg tama-nniḍen, deg unebdu i d-iḍerru uxeṣṣar deg wid ihellken. Ayagi imi, yeḥma lḥal, dɣa dayen i yettaken tagnit i yimikruben d yivirusen, ttafen nezzeh iman-nsen.

Ad d-nesmekti belli, imikruben-a ma ṭṭfen tafekka n wemdan ttdurun-tt nezzeh. Amedya, ma yeṭṭef yiwen amikrub seg tuččit ixeṣren, yezmer ad yesεu iriran, tawla, taεebbuṭ, timlillay, leqriḥ n tεebbuṭ, faccal. Neɣ s unamek-nniḍen, aya akk, yezmer ad t-yeṣṣiweḍ ɣer tmettant.

I wakken ad tḥerzem tazmert-nwen, newwi-awen-d deg umagrad-a 10 n yiwellihen i ilaqen akken ur thellkem ara.

1) Tarda n yifaṣṣen:
Taɣbalut tamerwarut n yimikruben i yessehlaken amdan, tettas-d seg yifassen imesxen. Daymi, i d-yewwi ɣef yal yiwen deg-neɣ ad yessirid ifassen-is ddeqs n tikkal deg wass. Mačči kan uqbel tuččit, neɣ ma yeffeɣ-d yiwen seg ubduz.
Seg tama-tayeḍ, ilaq ad neṣfeḍ ifassen-nneɣ deffir tarda s uceṭṭid azedgan.

2) Tarda n leqlul i nesseqdac deg useggi:

Ddeqs deg-neɣ i yenwan belli, ma yella ssarden dduzan-nsen n tuččit, sersen-ten ad kkiwen, dayen ffɣen-ten yimikruben. Daymi ahat, i ten-sseqdacen srid i uniwel war ma εewden-asen tarda. Meεna, ayagi d tuccḍa, imi d awezɣi ad ttwiksen akk yimekruben yellan deg-sen.
Ihi, ilaq ad εiwden tarda-nniḍen uqbel aseqdec, s waman d ṣṣabun d kra n waman n javel.

3) Tarda n yigumma d tidal i nesseqdac:
Igumma d tidal i d-nettaɣ, ilaq ad iriden akken iwulem. Di tazwara, grem-ten deg waman d cwiṭ n lxel, seld aya, εiwdem-asen s waman zeddigen ddeqs n tikkal.

4) Igumma d tidal ilaq ad ttwasersen deg yemsiṣmeḍ:

Seg tmentilin n waṭṭan, d tuččit n yigumma akken ḥman, daymi i ilaq ad ttwasersen deg yemsiṣmeḍ alamma uɣalen d iṣemmaḍen.

5) Tarda n yemsiṣmeḍ:

Imsiṣmeḍ daɣen, yezmer ad yili d tamentilt n yimikruben, ma yella ur yettirid ara. Γef waya, ilaq ad yili d azedgan.

6) Ur d-ttaɣem igumma d tidal yettnuzun di berra:

Yelha yiwen ma yettaɣ-d igumma-s d tidal-is seg umkan azedgan, i bellεen. Γas ma yerna cwiṭ n uṣurdi ɣef berra, lameεna ad d-yaɣ lḥaǧa zeddigen, xir n tin n berra teččur d imikruben.

7) Ṭṭalayet ɣer sselεa-nwen ma d tamaynut:

Uqbel ad d-taɣem taɣawsa, ama d igumma, tidal, neɣ d ayen-nniḍen, muqqlet ma d sselεa tamaynut, neɣ ma mazal ddeqs i wakken ad temmet.

8)Ur d-ttaɣet nnig n wayen umu tesram:

Llan wid iteffeɣ leεqel, ttaɣen-d nnig n wayen umu sran. Imir-n tettɣimi-asen sselεa deg uxxam buhan texeṣṣer-asen.

9) Ttḥadaret aksum d uyaẓiḍ i d-tettaɣem:

Ur d-ttaɣet aksum neɣ d ayaẓiḍ sɣur wid ur tessinem. Ilaq ad tesεum taflest deg win ansi i d-ttaɣem, belli ixeddem ayen yelhan.

10) Ur ssejmadet aksum:

Ladɣa deg unebdu, wexxret ɣef usejmed n weksum, imi llan yemsiṣemḍen ur laqen ara. Amdan ilaq ad yissin taseddart iwulmen i wakken ad yessejmed myal taɣawsa. Rnu i waya, ula d asefsi-ines, s iṣuḍaf-is, mačči εeddi kan.