Tukkist seg ungal ” Tasfift tessefsi tussaft” n Liza Serrik.

Ungal: Tasfift tessefsi tussaft
Tamarut: LIZA SERIK
Tiẓrigin IMTIDAD ( 2023 )
======================================

#Tukkist_seg_wungal :

   Ṛuza daxel n tzeqqa tameqqrant, tḍaq  melmi ara d-teffeɣ seg-s. Deg yal tiɣmert seg tɣemmar-is, tettwali udem n yemma-s. Seg yal aceqqiq n yiblaḍen-is, tsell i ṣṣut-is mi ara as-d-tessawal. Yal mi ara tezzi ɣer yal tama ; tikkelt ad twali lexyal-is, mi teqqim deffir uẓeṭṭa, tettxtir initen n lexyuḍ n taḍuḍt, tikkelt ad tuɣal yis-s ccfawa ɣer mi ara tettheggi isɣaren ɣer lkanun akken ad tessiɣ times.
Ulac amḍiq ur tt-id-yesmektayen ara s yizri-s, s temẓi-s,  s yemma-s. Temdel allen-is, tessers aḍellaε di rrif. Akken kan i truḥ ad teffeɣ, tesla i yiwen n ṣṣut i tt-id-iḥebsen, yeǧǧa-tt ad tuɣal ɣer deffir ɣas ma ad d-keflen leǧruḥ-is. Tettezzi akkin d wakka, tettnadi ansi i d-yekka, armi i d-tεedda tiṭ-is ɣef yiwet n teɣmert di tmurt, ziɣ d amcic ara yessekfalen deg yiɣiɣden, deg tsigert n lkanun tasemmaḍt. Yetturar deg-s, yessebεad isɣaren-nni yeqquren ɣer rrif. Truḥ ɣur-s tenna-yas s teḍsa :

   — Ziɣ d kečč aya a minuc, tessxelεeḍ-iyi, nniɣ-as amer yettwazdeɣ uxxam-a.
Tekna ɣur-s, tesluf i teglimt-is tawraɣt tuɣal tenna-yas :
   — Ur ak-walaɣ ara akk ansi i d-tkecmeḍ, acu kan tura ilaq ad tedduḍ yid-i, ad rreɣ tawwurt i tzeqqa, ulamek ara ak-ḥareɣ da.

Amcic yettkemmil deg urar, s waccaren-is yesxibbiḍ deg lkanun. Yessebεad isɣaren-nni yerɣan akkin d wakka, yettɣizi di tlemmast. Gar-asen tedda-d yiwet n tɣawsa, temgarad, ur telli d asɣar, neɣ d tiregtin seg tid-nni yeččuren amkan.
Ṛuza mi tt-twala, temmeɣ akken ad tt-id-teddem. D tamecṭuḥt, d tacebḥant, tga am tkarṭiwt n plastik, acu kan zuret kra. Tesferfud deg-s, tseffeḍ aɣebbar d yiɣiɣden ineṭḍen fell-as. Armi i d-teldi temdelt-is; tekkes-itt-id sdaxel. Tettwali-tt seg yal tama, di tlemmast-is, snat n tefla am wallen, ma seg tama ufella zun d tasfift d tarqiqant, armi tt-teεqel,  tuɣal tenṭeq : ” Akka ara d tettban d takaṣiḍt ma ur ɣliḍeɣ ara, acu ara txeddem di lkanun?
Wissen acu i yellan daxel-is? Tettban d taqdimt, ur llint ara di lweqt-agi-nneɣ. Ulac win i tent-yessexdamen, ur cukkeɣ ara ad afeɣ lpuṣt ara tt-id-yeɣren.

    — Nesεa yiwen deg uxxam a Ṛuza! Ma tebɣiḍ ad tedduḍ, ad tt-id-iɣer. I as-yenna Amnay seg kra n ddqayeq kan segmi yekcem ɣur-s ɣer tzeqqa.
    — Ih! Wellah ar ɣas! Ahat deg-s tizlatin n Ḥnifa neɣ n Crifa, cfiɣ d tidak kan iwumi tḥemmel setti ad asent-tsel, ur as-qqareɣ ara tura arma kkseɣ ccek.
    — Tesmektaḍ-iyi-d, d nettat i d-iceyyεen ɣur-m, imi tεeṭṭleḍ ur d-teffiɣeḍ ara, lḥun, ha-t-an ad aɣ-tettraǧu.

Teffer takaṣiḍt daxel n lǧib-is, yeffeɣ akked Amnay ɣer setti-s, tenna-yas i Amnay ad tt-yerǧu, ur tettεeṭṭil ara fell-as, ad truḥ ɣer uxxam ad tessewjed iman-is, akken ad teddu yid-s s axxam-nsen.
——————————————–Sb 168 – 169 – 170

Ssarameɣ-awen taɣuri igerrzen i wungal-a

Afud iǧehden i Tmarut Liza SERIK / Tarebbet N-Lmut deg umecwar-is ilmend n tira s tutlayt-nneɣ.

Sɣur: Nura Tafat