32 n yiseggasen segmi i ɣ-yeǧǧa uneɣmas-amaru Taher Ǧaεut.Tajmilt d usmekti

Ilul Taher Ǧaεut(Taher Djaout) ass n 11 yennayer 1953 deg Ulxu, Aẓeffun, aɣir n Tizi Wezzu, yemmut ass n 02 yunyu 1993 s leɣḍer n yirebraben i t-yewwten s rrsas.

Taher Ǧaεut d amaru, d aneggal, d amedyaz, d aneɣmas, gar yimussnawen imezwura i yellan d asfel n tallit taberkant, tallit n rrebrab. Γas ma yella gedlen imru-s, meεna isem-is d later i d-yeǧǧa yimru-s mazal-iten d inegiyen ɣef teḥdeq d teẓwer d tmussni taεlayant i yekseb. Ma yella d isem-is yettwaru s wureɣ deg tkatut n zzman.

Yebda Taher Ǧaεut amecwar-is n tɣuri di taddart-is, armi d aseggas n 1964 anda i iguǧǧ i Lezzayer Tamanaɣt netta d twacult-is, dinna ikemmel taɣuri-s. Deg useggasn 1974 yewwi-d turagt ( licence ) di tusnakt seg tesdawit n Lezzayer tamanaɣt.

Rnu i tira n taseklant i yella yettaru, Mass Taher Ǧaεut yura ddeqs n yimagraden neɣ n yiḍrisen iɣamsanen, dɣa isurifen-is imezwura llan deg uɣmis  (El Moudjahid ). Seg 1976 armi d 1977 netta yettaru deg-s. Asmi i yekfa axeddim-is n lεesker deg useggas n 1979, yuɣal ɣer weɣmis-a. Ad d-nesmekti belli deg useggas-nni i yezweǧ.
Seg 1980 armi d 1984 d amasay ɣef yisallen n yidles deg unmalas Algérie-Actualité.
Deg useggas n 1985, tennufka-s tegnit akken ad ikemmel taɣuri-s deg Fransa, dɣa yunag ɣer dinna netta akked twacult-is.

Imi d-yuɣal deg useggas n 1987 ɣer tmurt, ikemmel axeddim-is n uneɣmas deg uɣmis n Algérie-Actualité.
Yexdem Taher Ǧaεut akken ad yessissen imedden inaẓuren izzayriyen, ama wid yellan di tmurt neɣ berra-s. Syin akkin yekcem ula di tsertit, imi deg tallit-nni ddeqs n yineḍruyen i d-yellan.

Deg useggas n 1992 yeǧǧa axeddim-is deg uɣmis Algérie-Actualité yesnulfa-d netta d kra n yimdukkal-is am Arezki Metref d Abdelkrim Djaad anmalas d amaynut. Uṭṭun-is amezwaru yeffeɣ-d ass n 16 yennayer 1993.
Ass n 26 mayyu 1993, yettwat sdat wexxam-is s rrsas i uqerruy.
Seg wayen yura:

•L’Exproprié  (ungal)

•Les Chercheurs d’os (ungal)

•L’Invention du désert (ungal)

•Le Dernier Été de la raison (ungal)

•Les Vigiles (ungal)

Tamawt: tuget n yisallen nekkes-iten-id seg wikipedia.

Sɣur: tafukt n yiḍ