Tasuqilt : DJAMAL MAHROUG

Tiẓrigin Talsa, 2025.

Tukkist :

[…]

¹ Cafard
² Echantillons
³ Représentant de commerce
⁴ Cadre
……………………………………… Sb 5 – 6
ⵣⵣⵣⵣⵣⵣⵣⵣⵣⵣⵣⵣⵣⵣⵣⵣⵣⵣⵣⵣ

Ayen yekka akk yiḍ, netta la yettneqlab. Kra yurga, ur yelhi ara. Mi d yuki tanzayt, Gregor Samsa yufa-d iman-is yuqel d yiwen n ucraraq¹ d ameqqran, la yessexlaεen. Yeẓẓel ɣef uεrur ; aεrur-is d win yeqquren am uẓru. Mi d-yerfed cwiṭ aqerru-s, iwala aεebbuḍ-is aqehwi i icuffen. Ɣef uεebbuḍ-is, ters tduli ur neṭṭif ara akken i iwata, i yezmer ad d-yesseɣli ula d azemmeḥrir. Ahdum-nni n tqejjarin tirqaqin tiɣezfanin, i yeεsa, ttḥerrikent weḥd-nsent sdat wallen-is.

« D acu akka i yi-yeḍran? » , i yenna deg wul-is. Mačči d targit. Taxxamt-is d taxxamt n yimdanen, xas tettbini-d mecṭuḥet. D tin akken i yesεan yakan ukkuẓ n yiɣraban, i yessen akken i iwata. Ɣef tgida, anda rrsent kra n tikkas² n lkettan — Samsa ixeddem d agensas n tnezzut ³ —, tettbini-d, daɣen, tugna i yerra ɣer ukatar-nni⁴ , i izewwqen s uwreɣ, i iεelleq ɣef uɣrab ; tin i d-yekkes seg yiwet n tesɣunt. Tugna-nni, teskan-d yiwet n tmeṭṭut, i yeṭṭfen yiwet n tcacit akked tebḍant n uzrem. Tameṭṭut-nni, tbedd akken i ilaq, tesken-d i uzayez taḍunt-nni i terra ɣef ufus-is, i yeffren akk iɣil-is.

Syin akkin, yezzi Gregor ɣer ṭṭaq. Addad n tegnawt, d win i as-id-ibanen yexser — la isel i tmiqwa n ugeffur, mi d-ɣellint ɣef yiri n ṭṭaq —, aya, d ayen i t-isḥeznen. « I lukan ad aɣuleɣ ɣer-tguni cwiṭ, akken ad ttuɣ akk ttmesxir-agi?» , i yenna deg wul-is ; maca, aya, d awezɣi, acku, iwulef yeggan ɣef tama tayeffust, yerna, deg waddad-nni ideg yella, ur yezmir ad yezzi ɣer tama-nni. Akken i yexdem akken ad yezzi ɣer tama tayeffust, ad d-yeɣli, yal tikkelt ɣef uεrur. Ahat yeεreḍ tawinest n yiberdan, s tuqqna n wallen, akken ur yettwali ara tugna n tqejjarin-is, i la yettḥerriken weḥd-nsent. Ur yeḥbis ara, armi i iḥulfa i uqraḥ urǧin yessin, di tama n yibeṛdi-s.

Taɣuri igerrzen

Afud iǧehden i Mass Djamel Mhrg deg umecwar-is n tira.

Sɣur: Nura Tafat