(Tiwlafin).Ayt Smaεel (Bgayet): tεedda tfugla n tikci n warrazen i yinelmaden i d-yewwin akayad n BAC akked win BEM akken iwata

Akken i nuɣ tannumi myal aseggas, thegga-d tɣiwant n Ayt Smaεel ɣef uqerru-s aselway-is Mass Sadeq Rebaεi leqdic s wazal-is i usebɣes d usnemmer n yinelmaden i d-yufraren deg yikayaden n Bac d Bem akked yimawlan-nsen.

Tafugla-ya tella-d ass n sed 23 ɣuct yezrin deg tnedlist n taɣiwant n Ayt Smaεel. Anda i ddren wid i d-yusan ama d inelmaden, imawlan-nsen, tawacult taɣurbizt, inebgawen n lḥerma akked yimezdaɣ n Ayt Smaεel yiwet n teswiεt n tumert ara yiqqimen deg wallaɣen-nsen i lebda.

Ad d-nesmekti belli kra win i d-yewwin ama d akayad n Bac neɣ d win n Bem yettunefk-as warraz, d acu kan wid i d-yufraren s tezmilt εlayen fkan-asen arrazen yemxalafen cwiya neɣ ɣlayen ugar di ssuma. Iswi-nsen d asnemmer d yinelmaden i d-yusan d imezwura seg tama, ma seg tama tayeḍ d asebɣes n yinelmaden ara yesεeddin ikayaden-nsen deg yiseggasen i d-iteddun akken ad ufraren s tezmilin igerrzen.

Akken i nessen Mass Rebaεi d win iḥemmlen tamussni d kra win iqeddcen fell-as, ɣef waya yesedda-d deg wahil-is n usnemmer ula d semmus (5) n yinelmaden i yeqqaren berra taɣiwant n At Smaεel yefka-sen arrazen daɣen.

War ma nettu, ddeqs n wid iḥeḍren i d-yefkan awal-is, ladɣa iwellihen i yinelmaden akken ad ḍefren abrid-nsen srid ɣer usmurres n uzekka.

Dɣa deg wawal-is Mass Rebaεi yesnemmer inelmaden d twaculin-nsen akked twacult taɣurbizt ɣef uxeddim-nsen war εeggu seg tazwara n useggas armi d taggara-s i d-yeglan s yigemmaḍ lεali. Akken i d-yemmeslay ɣef uswir n Summam 20 ɣuct 1956 i yefkan i umennuɣ n ugdud Azzayri tawlaft tuzzigt, dɣa d tagnit yesserḥem ɣef yimeɣraden yemmuten fell-asen talwit.

S ugzul n wawal, timlilit-a tella-d d tagnit i tumert d unecraḥ d umbaddel n tmuɣliwin d yiwellihen gar kra win i d-yerzan.