Tajmilt d usmekti: aseggas segmi i ɣ-yeǧǧa unemhal amatu n termist Summam Lunis Ḥamiṭuc

D yiwen seg yergazen i yuran isem-is di tkatut n kra win i t-yessnen neɣ i yeslan s yes-s. D bab n lxir akken i ḥemmlen ad as-ssiwlen akk , yettεawan yettak afus n tallelt i kra win i as-yessran.

Ilul Mass Lunis Ḥamiṭuc deg useggas n 1946 di taddart n Yicellaḍen, taɣiwant n Uqbu. Yedder di twacult n yifellaḥen am netta am tuget n warrac di lawan-nni.

Deg useggas n 1993 yebda amecwar n uxeddim i yiman-is, ɣas ma ur yeɣri ur yeksib agerdas, yeldi tarmist n Summan n ifuras i d-yettwaxdamen s uyefki.

Ad d-nesmekti belli s drus maḍi n ttawilat i yebda amecwar-is, meεna lebɣi i yesεa d tegzi akked leḥmala n uxeddim-is εewnen-t nezzeh i wakken ad yesmurres.
Syin akkin yuɣal yettrebbi tifunasin, yettaɣ-d ayefki sɣur wid yettrebbin akken ad d-iεawen iman-is ugar.
Ifuras n Summam wwḍen ɣer twilayin akk n Lezzayer, rnu yessuffuɣ ula i berra n tmurt.

Kra n yiseggasen, Mass Ḥamiṭuc yeldi ula d isensuyen, yuɣal yessimɣer leqdic-is.

Γas ma yella d imḍebber n termist n Summam, meεna werǧin yessers iman-is d amerkanti. Win ur t-nessin ara ad as-yini ur yeksib iqqiḥ imi yella d amdan yessnen nezzeh i temdanit, tessɣer-it ddunit, ijerreb yeẓra rnu yeḥsa dakken ddunit d imuras kan.

Mass Ḥamiṭuc d imserreḥ n ufus neɣ d ssaxi, ifka afus n lemεawna ama i yimuḍan, ama i yiẓawaliyen, neɣ i kra win yessutren ɣur-s tallelt.
Ahat ayen yeqqimen deg wallaɣ-nneɣ ugar, d ayen iga deg tallit-nni n Corona anda i yefka ugar n 20 n tmenḍayin (ambulances) i sbiṭarat n tmurt, rnu i waya yesbedd ddeqs n tmacinin i d-ixeddmen oxygène.

Yeǧǧa-aɣ ass n 19 di yebrir 2025. Ass-a aseggas segmi i ɣ-teǧǧa tfekka-s, wamma azal-is deg ulawen ad yidir i lebda.