Asegmi aɣelnaw: ulac awexxer n yimuraṣ n tegrest

Di lawan anda i ttmeslayen akk Yizzayriyen ɣef uwexxer n yimuraṣ n tegrest, ɣef demma n waṭṭan n Corona i irennun ussan-a. Iwekked-d uneɣlaf n usegmi n Tmurt n Lezzayer zgelli kan, belli ur d-yettili waya.

Yuɣ lḥal, ɣas ma yella berrḥen-d belli ad ffɣen warrac ass n 16 dujember yezrin, lameεna ssqerben-d imuraṣ i wass n 9 dujember. Acku, llan kra n yinelmaden i ihelken deg kra n yiɣerbazen.

Ma yella d tuɣalin n warrac, ur d-yettili deg-s ubeddel. S unamek-nniḍen, arraw-nneɣ ad uɣalen ɣer yiɣerbazen-nsen asw n 2 yennayer 2022.

Ad d-nesmekti belli, amḍan n wid ihelken aṭṭan n Corona simmal irennu. Ihi yewwi-d ɣef yimawlan ad sseḥbibren ɣef warraw-nsen, ad asen-ssegzun amihi n waṭṭan-a d wamek ilaq ad ttḥadaren iman-nsen.

Seg tama-nniḍen, d tagnit i yiselmaden di asmi ara uɣalen, akken ad kemmlen ad asen-ssegzin ugar ɣef waṭṭan-a. Nessaram-asen tuɣalin igerrzen i warraw-nneɣ d yiselmaden-nsen.