Actualité Idles Tasekla 

08 MEΓRES D TALALIT N USALAS N TSEKLA D YIDLES MULUD FERƐUN

Rédac , , , , ,

Mulud Ferɛun, isem-is n tidet : Lmulud At Caɛban. D amaru, d aneggal s tutlayt tarumit. Illul ass 8 meɣres 1913 deg Tizi Hibel (Tizi Wezzu). Yettwanɣa s ufus n umussu n O.A.S. ass n 15 meɣres 1962 deg Lebyar.
Yekcem aɣerbaz amenzu n taddart-is deg useggas n 1928. Tettunefk-as texriḍt i ukemmel n tezrawin-is deg Uɣerbaz amenzu unnig n Tizi-Wezzu. Deg useggas n 1932, yeɣra deg Uɣerbaz Amagnu deg Buzerriεa anda yemlal d umaru Emmanuel Roblès, uɣalen d imdukkal n lebda. Deg useggas n 1935, d aselmad deg uɣerbaz amenzu deg Tizi-Hibel almi d 1946 i ikemmel aselmed deg Tewrirt Musa. S uswir-is ifazzen deg tmusni n uselmed, yuɣal d anemhal deg yiwen uɣerbaz deg Larbεa n At Yiraten deg useggas n 1952, ssin d anemhal deg Uɣerbaz n Naḍur (Lezzayer tmaneɣt) aseggas n 1957.
Deg useggas n 1960, yuli d amaswaḍ n Yinammasen Imettiyen deg Château-Royal sdat n Ben Ԑeknun anda yettwanɣa lwaḥi d yimdukkal-is s ufus n umussu O.A.S.
Mulud Ferεun yeǧǧa-yaɣ-d aṭas n yidlisen yuran s tefransist. Ungalen i yura :

  • Mmi-s n yigellil (Le fils du pauvre, 1950). Yewwi deg-s arraz « Grand Prix de la ville d’Alger ».
  • Akal d yidammen (La Terre et le sang, 1953) Yewwi-d yes-s arraz imi qqaren “Prix Populiste”.
  • Iberdan yessawnen (Les Chemins qui montent, 1957)
    Yura daɣen sin n wungalen, ffɣen-d seg mi yemmut :
  • Amulli (L’Anniversaire, 1972) d ungal ur yekfin, d arummid.
  • Iɣrem n yijeǧǧigen (La Cité des Roses, 2007)
    Yeǧǧa-yaɣ-d daɣen idlisen-nniḍen, yiwen d ammud n tmedyezt s tsuqilt n yisefra Taqbaylit-Tafransist, azwel-is : Isefra n Si Muḥend (Les Poèmes de Si Mohand, 1960).
    Seg mi yemmut i d-ffɣen daɣen yidlisen-is :
  • Aɣmis (Journal 1955-1962) aseggas n 1962.
  • Ussan deg tmurt n Leqbayel (Jours de Kabylie, 1968)
  • Tibratin i yimdukkal (Lettres à ses amis, 1969)

Talalit n Mulud At Caεban d azamul n Tefsut d tlelli. Acku, 08 Meɣres d Ass agraɣlan n yizerfan n Tmeṭṭut ; tilawin ddment adeg ameqran deg wungalen-is. Γas tudert ḥercawet teččur d isennanen : laẓ, lḥif d waṭṭanen, maca dima zgant cerhent, ḍsant. D nutenti i d ul n uxxam, n taddart, n tmetti ; d ul n usirem.
Akka daɣen i yedder tudert-is Mulud At Caεban : d uguren i t-id-yessakin seg naddam, simmal itekkes tagut i yal abrid ireglen niɣ yessawnen ; yufa-yas-d tasarut swayes teldi tewwurt.

Tajmilt sɣur: Nacer Medjdoub