Tajmilt i unaẓur amaru-amedyaz Lxeyyer Brahimi

Ilul Mass Lxeyyer Brahimi ass n 16 yulyu 1961 di taddart n Ayt Tεisiwt, taɣiwant n Ayt Smaεel Bgayet.  Segmi i d-nemɣur necfa-as-d d ameɣnas n tutlayt d yidles amaziɣ, d aqeddac ur nεeyyu i ubaɣur n yidles-nneɣ.
Dda Lxeyyer d anaẓur n ufus d yiles. Yefka-d ayendin i tẓuri. Yella d win yesselḥayen imru ama ɣef leḥyuḍ neɣ ɣef tferrawin. D amedyaz i yessefran ɣef ddeqs n yisental, tanaslit, tajaddit, tameṭṭut, tayri, timetti d wayen-nniḍen.

Mass Brahimi yella seg yiεeggalen  imezwura n tdukkla tadelsant Adrar n Fad. Seg wid iqedcen deg-s armi d asmi i d-tger lmut afus-is. Ulac tiẓrigt n tmedyezt anda ur yeḥḍir. Rnu ɣer-s , yella seg wid  yekkin deg tlalit n usalay n ufexxar n tdukkla-ya.
Armi ssawḍen yiεeggalen-is ttheggin-d timsizzelt taɣelnawt n ufexxar.

Am akken i yella d amaru i εerḍen seg ul-is i wakken ad yeḥrez ansayen n temnaḍt n Ayt Smaεel ledɣa deg wayen yerzan lebni n yiqennucen d yizamulen i d-yettwarqamen fell-asen, akked ticraḍ i cerḍent tlawin d yinumak-nsen, yessufeɣ-d adlis deg useggas n 2010 s wazal-is umu yefka azwel ” yal azamul yesεa azal ” . Syin akkin yerna-d adlis-nniḍen n tmedyezt s uzwel ” tisit n udrar n Fad ” deg useggas n 2015.

Yella seg wid iḥerzen ansayen, seg wid  yettzuxxun s lasel-is. Netta i d-yerran ddeqs n wawalen yellan ttwattun di temnaḍt n Ayt Smaεel, acku yettnadi nezzeh deg wayen yerzan tigemmi timawit n temnaḍt-a. Awalen-a yessemras-iten deg yisefra-s.
Agama d twennaḍt n At Smaεel sruḥen amdakkel seg yimdukkal-nsen εzizen. Dda lxeyyer i yellan d amdakkel n ugama ulac d acu ur d-yesnulfa seg yisufar i d-izeddem seg-s. Ula d akal iḥemmel-it yesεa yid-s assaɣ d uzzig, d taqsiḍt n yideqqi d babi-s neɣ ubabat d mmi-s i d-yesnulfan myal ssenf n uqennuc.

D imekki imekdi n temliyin d tfaskiwin n tmedyezt i d-yettilin deg temnaḍt n yiqbayliyen.

Yeǧǧa-aɣ Dda Lxeyyer ass n 19 ctember yezrin, meεna s tfekka kan, imi isem-is tayri-s leqdic-is ad qqimen i lebda.
Sgunfu di talwit a Dda Lxeyyer.