Arraz n Asya Ǧebbar n wungal ifazzen : 26 n wungalen i yettwaṭṭfen
Di teẓrigt-is tis 8, taseqamut n yinezurfa n warraz Asya Ǧebbar, tefren-d 26 n wungalen i d-yufraren s uswir-nsen aseklan aεlayan. Ineggura-ya ad myezwaren ɣef warraz amezwaru n tamsizzelt-a. Ungalen-a dɣa ttwarun s kraḍ n tutlayin, tamaziɣt, taεrabt, d trumit.
Ad d-nesmekti belli, di teẓrigt n tikkelt-a, kkin 155 n wungalen n 155 n yimura, i d-yeffɣen ɣer 55 n yexxamen n teẓrigin. Gar-asen 13 n yizwal s tmaziɣt, 79 s taεrabt, akked 63 n yizwal s trumit.
Dɣa ɣef leḥsab n uselway n tesqamut n yinezurfa imsuqel-amedyaz Mass Ḥakim Milud, tuget n yimekkiyen d ilemẓiyen i ikecmen yakan ɣer wannar n tira. Aya d ayen yessefraḥen, acku d tazmert ara d-rnun i umaḍal n tsekla.
Gar 26 n yizwal i d-yettwafernen, llan 6 n wungalen s tmaziɣt, 10 s taεrabt, 10 s trumit.
Ungalen yettwarun s tmaziɣt, tasrit tis tesεa n Sid Ali Cherifi (tiẓrigin talsa), Iɣisi N Wureɣ n Dihia Hamitouche (Tiẓrigin Imtidad), D asderfef n Chabha Ben Gana (tiẓrigin Imtidad), Tiɣri n Tudert n Sihem Harikenchikh (tiẓrigin Talsa), Aggus n Farida Sahoui (tiẓrigin Talsa) et Akud i tudert, tagnit i tayri n Djamel Benaouf(tiẓrigin Imtidad).
Ma d ayen yerzan taseqamut n yenezurfa, rnu i Mass Hakim Mouloud d aselway, llan daɣen 10 n wudmawen-nniḍen seg umaḍal n tsekla d unadi. Tamarut Maïssa Bey, akked tmaruyin Meriem Guemache d Leïla Hamoutène, Mass Mustapha Madi akked Mass Cherif Meribai. Mass Ahcene Mariche d Mass Idir Belali, Mass Hamid Bouhabib akked umnadi Koussaïla Alik.
