Tajmilt : seld 36 n yiseggasen n uxeddim deg uḥric n usegmi, ad yeffeɣ Mass Safer Ali tastaɣt seg teggurt tawesεant.

Qqaren imezwura-nneɣ ulac tazwara ur nesεi taggara. Ayen yeẓẓa yiwen, leqrar-is ad t-id-yemger.

Llan iselmaden i yuran isemawen-nsen di tkatut n warrac imecṭaḥ n tsutiwin n wass-a, d irgazen n wass-a i yellan iḍelli d igerdan, s uxeddim d iwemlihen-nsen. Gar-asen ad d-nebder aselmad n temnaḍt n At Smaεel Mass Safer Ali.

Mass Safer, i yebdan amecwar-is n uselmed deg useggas n 1990, deg uɣerbaz amenzu n Tregragt, yella d aselmad n tutlayt taεrabt. Meεna axeddim-is ur yeḥbis deg uselmed kan, imi yella d imwelleh i yettaken i warrac iwellihen ɣef tudert s umata.
Yettwassen s rrzana d teḥdeq deg uxeddim-is. D uḥnin, d win yessnen amek ara yekcem srid ɣer wul n ugrud. Dɣa anelmad ma iḥemmel aselmad-is, ad iḥemmel ula d taɣuri, ad d-yawi igemmaḍ yelhan. Ayagi εeddan-d fell-as yinelmaden n Mass Safer s tnagiwin-nsen. << leεmer yerfed afus-is fell-aɣ, neɣ yeǧǧ-aɣ nefqeε fell-as, yella mačči kan d aselmad, nerra-t deg umkan n ubabat. Yesɣarayseg ul-is, iḥemmel axeddim-is, dɣa ula d nekkni nḥemmel-it nettεuzzu-t>>, i d-yenna yiwen seg yinelmaden-is i yessɣer deg yiseggasen-is imezwura.

Gar umecwar-is n uselmed seg 1990 armi d 2015, d umecwar-is n unemhal seg 2015 ar ass-a. Mass Safer Ali yexdem deg xilla n tuddar n temnaḍt n leqbayel am Uqbu, Tizi n Berber, Areccaḥ, At Smaεel d tiyaḍ. Meḥsub anda yedda ad yeǧǧ amkan-is d azedgan d acebḥen. D win i ḥemmlen tqadaren akk, ama d inelmaden d iselmaden neɣ d imezdaɣ n temnaḍt-nni.

Ass-a seld 36 n yiseggasen n uxeddim, tewweḍ-d nnuba-s akken ad yefk akud i yiman-is ad yesteεfu. Nessaram-as tumert, teɣzi n tudert d ussan imellalen icebḥanen.
Ayen i tgiḍ i tsutiwin, adak-d-yuɣal s lxir d talwit di tudert-ik.